Die jongste oor grondonteiening en eiendomsreg


26 Junie – Die landwye openbare sittings oor die moontlike wysiging van Artikel 25 van die grondwet, sal vandag in Springbok in die Noord-Kaap begin. Die sittings sal lede van die publiek ‘n geleentheid gee om kommentaar te lewer op die voorstel dat die grondwet gewysig word om die onteiening van grond sonder vergoeding toe te laat. Dit volg nadat die Nasionale Vergadering in Februarie ‘n mosie oor die kwessie goedgekeur het. Die ANC en die EFF is ten gunste van grondonteiening sonder vergoeding, terwyl partye soos die DA, Cope en die Vryheidsfront Plus daarteen gekant is. Die Gesamentlike Grondwethersieningskomitee het meer as 700-duisend voorleggings oor die kwessie ontvang.
Praat Saam, Vrydag 22 Junie 2018: Grondhervorming en eiendomsreg

Die DA-leier, Mmusi Maimane, sê die werklike probleem met grondhervorming is die gebrek aan politieke wil binne die ANC, en dat inmenging om artikel 25 van die Grondwet oor grondonteiening te toets, rampspoedige gevolge vir die ekonomie sal hê, wat beleggers sal afskrik. Watter rol kan grondhervorming speel om eiendomsreg in Suid-Afrika uit te brei.

Lees en luister ook

Nuus, 21 Junie 2018 – Die Parlement se gesamentlike Grondwethersieningskomitee gaan ‘n eksterne diensverskaffer gebruik om te help met die verwerking van die bykans ‘n miljoen voorleggings wat ontvang is oor grondonteiening. Die komitee ondersoek die moontlikheid van wysigings aan Artikel 25 van die grondwet om onteiening sonder vergoeding moontlik te maak. Die mede-voorsitter van die komitee, Vincent Smith sê die voorleggings sal verwerk word voordat die komitee vir ses weke openbare sittings hou. Smith sê hulle het daarna 30 dae tyd om die inligting te dokumenteer.
Monitor, Maandag 28 Mei 2018
Landbougemeenskap moenie grondhervorming vrees nie – Ramaphosa

President Cyril Ramaphosa sê boere moenie bang wees nie, maar moet met die regering saamwerk om ‘n oplossing vir grondhervorming te vind. Ramaphosa het gisteraand tydens ‘n besoek aan die SAUK in Auckland Park gesê boere het talle idees om die grondprobleem aan te pak. Izak du Plessis het met Ramaphosa gepraat….

Monitor, Donderdag 10 Mei 2018. – Parlementêre komitee met vals voorleggings oorval

Die afsnydatum vir die openbare verhore van die parlementêre grondwetlike hersieningskomitee, wat die onteiening van grond sonder vergoeding moet oorweeg, gaan heel moontlik uitgestel word. Die komitee het reeds meer as ‘n 100-duisend skriftelike voorleggings ontvang. Die afsnydatum vir die skriftelike voorleggings is einde Mei, terwyl die openbare verhore se Augustus afsnydatum dalk tot September verskuif moet word. Vincent Smith, ANC-LP en medevoorsitter van die komitee, se^ al die vergaderplekke wat deur die komiteelede in die proses besoek gaan word, sal vandag (DONDERDAG) aangekondig word. Hy het met Malixole Gwatyu gepraat…

 

Lees en luister ook

Monitor, Dinsdag 8 Mei 2018. – Geskiedenis van grondbesit in Suid-Afrika

Geskiedenis word tot ‘n groot mate deur die maghebbers bepaal. Die Suid-Afrikaanse geskiedenis AANLYN blad – SA History Online – het ‘n artikel gepubliseer oor die sogenaamde leë land-teorie. Daarin verduidelik die skrywers hoe die Britse Ryk en later die Nasionale Party aangevoer het dat die land leeg was en dat swart mense vanuit die noorde en wit mense van die suide deur die land getrek het. Die artikel wys daarop dat die teorie nie histories of antropologies bewys kon word nie. Nou is die vraag of die geskiedenis die politiek van die dag dien of andersom. Metzi van der Merwe doen verslag.

Monitor, Dinsdag 8 Mei 2018. – Khoi San voel uitgesluit van grond-eise

Suid-Afrika behoort aan die Khoe en San en daarom is die regering se konsultasieproses oor die onteiening van grond sonder vergoeding ‘n bedrogspul en nie werkbaar nie. So sê Anthony Phillip Williams, leier van die Inheemse Eerste Nasie-beweging van Suid-Afrika. Dit volg na ‘n Khoe- en San-grondberaad in Johannesburg waaraan verskeie belangegroepe waaronder Afriforum, Black First Land First en die Suid-Afrikaanse Menseregtekommissie deelgeneem het. Williams sê die huidige debat oor grondbesit in Suid-Afrika is oneties as dit sonder die stem of deelname van die Khoe San, die eintlike grondbesitter van die hele Suid-Afrika, plaasvind. Volgens hom moet Suid-Afrika eers simbolies aan die Khoe en San teruggee word, alvorens daar oor enige grondverdeling gepraat kan word. Malixole Gwatyu het met hom gepraat.

Monitor, Dinsdag 8 Mei 2018. – Argeologie kan lig werp oor grondbesit

Terwyl geskiedkundiges meen dat politici geskiedenis dikwels manipuleer en inspan om hulle eie posisie te versterk, sê argeloë die aarde vertel nie leuens nie. Marlinée Fouché berig dat die argeologie juis kan help om van die leë spasies in ons geskiedenis in te vul. Vondse uit veral die ystertydpek, toon dat hier wel mense in Suider-Afrika geleef het voor Jan van Riebeeck se aankoms in 1652…