Hoogty: RSG se nuwe oggend-boekvoorlesing


Sussie Kotzé se see-roman soggens voorgelees

Die digter en letterkundige Petra Müller het eenkeer gesê Sussie Kotzé het amper eiehandig ’n seewoordeskat in Afrikaans behoue laat bly. Dít is wat ‘n mens dadelik opval met die lees van E. Kotzé (ook bekend as Sussie Kotzé) se roman, Hoogty, wat sprankel met woorde soos “jobbel”, “rondereel”, “bonks” en “ghoe-ghoe”.

Hoogty is RSG se nuwe oggend-boekvoorlesing, wat van Dinsdag 14 April elke weekoggend om 11:45 deur Elize Cawood voorgelees word.

Elize Cawood is die voorleser, en sy is uitstekend.

Elize Cawood is die voorleser, en sy is uitstekend.

Hier is ‘n uitttreksel uit die eerste boekvoorlesing en ‘n kykie agter die skerms:

Die omslag van die boek.

Die omslag van die boek.

Dit is ‘n Weskus-verhaal oor die streek, sy mense, die see asook die troebel en helder waters waardeur verhoudings gaan.

Dit handel oor Helena Burger, wat nes haar pa vreeslik hardekop kan wees en vinnig om op haar perdjie te klim. Haar ma se brief noop haar om terug te keer na Volleminkbaai en haar pa te oortuig dat Boetie nie op die see hoort nie, maar eerder Kaap toe moet gaan vir sy laaste twee jaar op skool. Maar Helena se pad verloop skielik heel anders as wat sy haar verbeel het…

Jeanette Ferreira het op Litnet geskryf: “Wat Hoogty ’n spesiale kerfie op Kotze se oeuvre maak, is dat sy daarin slaag om die allergewoonste verhaal van allergewone mense te vertel en nogtans die spanning in stand hou; styfgetrek soos ’n nuwe visserstou wat heelnag in die melk gelê het om sy krag te toets. Wanneer sy haar van liriek bedien, is dit nooit soetlik nie; dit getuig eerder van die skoonheid wat in die alledaagse skuilhou, daar vir wie dit wil en kan.”

Sussie Kotzé wat reeds in 2013 haar 80ste verjaardag gevier het,  het Hoogty opgedra aan haar man, die Lang Skipper, wyle Willie Kotzé. Sy bedank hom dan ook voor in die boek vir die “onvergeetlike vertellings” wat die basis van hierdie roman vorm.

Die skrywer Sussie Kotzé

Die skrywer Sussie Kotzé