‘Geblik’ en ander dramas oppad


RSG se tweede Radioteater-seisoen van 2018 het op Donderdag 4 Oktober begin en duur tot einde Desember.

Volledige lys van dramas wat dié seisoen op jou wag

Donderdag 13 Desember: GEBLIK deur Esther von Waltsleben

Esther von Waltsleben

Esther von Waltsleben is ’n gedugte verhoogaktrise bekend om haar komiese solovertonings, maar het ook al in verskeie RSG-dramas soos die onlangse Die reine waarheid en die vervolgverhaal Die duiwehok gespeel. Haar debuut-radiodrama, Geblik, is klugtige komedie propvol kinkels en kabels.

Frank Powell is ‘n bekommerde sakemagnaat  en die grootbaas van die De-Lish restaurantkettinggroep. Hy stuur sy loskop-stralerjakker-seun, Jonathan, om onder die dekmantel van gehaltebeheer een van die takke te gaan besoek om vas te stel waarom dit nie so goed vaar nie. Die ambisieuse Gavin vergesel Jonathan op die spioenasietog na Blikfontein waar die tweetjies gou besef dat sake ook vir hulle gaan skeefloop…
Lees meer oor Geblik.

Donderdag 20 Desember: ELKE POT deur Perdita van Dijk du Bois
‘n Selfbehepte, geskeide vrou wat baie gesteld is op haar voorkoms, se gedrag verander op ’n dag drasties tot die stomme verbasing van veral haar ouer suster en voormalige man.

Riana Scheepers

Kersdag (25 Desember): ‘N WONDERWERK VIR KERSFEES deur Riana Scheepers
Die bekroonde skrywer Riana Scheepers het vanjaar se opdrag-Kersdrama, ’n Wonderwerk vir Kersfees, geskryf. Dit is losweg gegrond op ’n ware verhaal en karakter en word op Kersdag uitgesaai. Dit beloof om een van die hoogtepunte van die seisoen te wees.

Sarah is ‘n weduwee wat saam haar gesinnetjie op ‘n plot woon en ‘n lewe maak van ‘n klein boerderytjie en dit wat haar plotjie kan lewer.  Sy het ‘n padwinkeltjie  waar sy vars produkte uit haar tuin en tuisgemaakte produkte soos konfyt en gemmerbier verkoop aan verbygangers. Sy hou met lewensmoed en harde werk die gesinnetjie bymekaar.

Hul enigste vervoermiddel is ‘n ou bakkie wat saans langs die huis parkeer word. Dan is daar ‘n krisis en Sarah en haar gesin moet van die plaas vlug. Op ‘n bonatuurlike manier slaag Sarah daarin om die bakkie met haar huis se sleutels aan te skakel… Die drama is op ‘n werklike gebeurtenis gegrond.
Lees meer oor die Kersdrama.

Wilson Dunster en Eliza Cawood

 

Donderdag 27 Desember: MIKE & MAVIS deur Wessel Pretorius
Die seisoen word afgesluit met die veelbekroonde dramaturg en akteur Wessel Pretorius se Mike & Mavis met die akteurspaar Wilson Dunster en Elize Cawood in die titelrolle. Die regisseur is Gerrit Schoonhoven.

Mavis Kellerman, ʼn weduwee wat haarself afgesluit het vir die wêreld, behalwe vir haar e-posse met haar dogter, en haar weeklikse kerkdiens, ontvang ʼn uitnodiging vir die opening van ʼn nuwe bioskoop wat spesialiseer in klassieke rolprente. Die eienaar, Mike Lewis, is ʼn eksentrieke jongkêrel met ʼn ewige romantiese siel. Mavis besef gou dat Mike daarop uit is om haar hart te wen en bevind haarself aan die ontvangkant van ʼn vryery in haar herfsjare wat afspeel oor ʼn reeks romantiese afsprake. Wat sy egter nie weet nie, is dat sy en Mike ʼn geskiedenis deel wat lank voor die uitnodiging begin het. ʼn Romantiese komedie wat die hartsnare sal roer.

RSG se Radioteater word van Oktober tot Desember elke Donderdag om 20:00 op RSG (100 tot 104 FM) uitgesaai. Die radiodramas word Maandagoggend tussen 01:00 en 02:00 in Deurnag herhaal.

DATUM TITEL SKRYWER REGISSEUR
4 Okt Ontydige Tydings

Albert Short Christelle Webb-Joubert
11 Okt Laat Herfs

Richard van der Westhuizen Mari Snyman
18 Okt Die Testament

Rhona Peens Evert Snyman

(ARGIEF)

25 Okt Soek
Madelaine Volschenk Anrich Herbst
1 Nov Die Fietstoer

Joa Bekker Leon van Nierop
8 Nov Die Voëlhok
William Oosthuizen Eben Cruywagen
15 Nov Nog Net Twee Weke

Helena Hugo Helena Hugo
22 Nov Die Judasbok

Dalene Matthee Eben Cruywagen
29 Nov Ligter as die wind
Boerneef / André Kotzé Christelle Webb-Joubert
6 Des Road Trip

Corné Joubert Frieda van den Heever
13 Des Spesiaal Geblik

Esther von

Waltsleben

Johan Rademan
20 Des Elke pot

Perdita van Dijk du Bois Ronel Geldenhuys
25 Des
KERSDAG
‘n Wonderwerk vir Kersfees

Riana Scheepers Johan Rademan
27 Des Mike & Mavis Wessel Pretorius Gerrit Schoonhoven