Spieëlbeeld: ‘n Liefdesverhaal met ‘n kinkel


RSG se tweede radiodramaseisoen is in die laaste pylvak.

Donderdag 14 Desember: Spieëlbeeld deur Ronel Mostert
Andrea en haar tweelingsuster, Minke, sukkel na baie jare om vrede te maak. Wat is die ware geheim en rede vir die wrok wat tussen hulle lê en dreig om al groter te word?

‘n Liefdesverhaal met ‘n kinkel, terwyl die vrolike Vlooi sorg vir komiese genot.

Spieëlbeeld opsomming
Andrea is een van ’n tweeling wat altyd aan die korste ent trek. Haar liefde vir haar suster maak dat sy gereeld toegee, aanvaar, die ander wang draai en keer op keer vergewe. Maar waar trek sy die streep en wanneer is genoeg, genoeg?

Nadat die lewe en haar tweelingsuster haar weereens teleurstel, gaan kruip sy by ’n vriendin weg om haar wonde te lek. Sal sy die lewe, die mense naaste aan haar en die liefde weer ’n kans gee? Lê die antwoord in die hoeveelheid kere wat jy val, of die hoeveelheid kere wat jy opstaan?

Dié slag was soentonele anders…kyk die video

Die skrywer
Ronel Mostert het na 27 jaar die tuig as Bemarking- en Menslike Hulpbronbestuurder neergelê om voltyds te skryf. Haar eerste roman, Dubbele Wonderwerk, is deur Kwarts Uitgewers goedgekeur en in 2015 bekendgestel en uitgegee.

Sy het ook al vantevore haar hand gewaag aan kinderboeke en digkuns. Dit het tot gevolg gehad dat sy deur die Centurion College vereer is vir haar bydrae tot Afrikaans. Sy is bekend vir haar flitsverhale, wat onder andere in die Sarie, Vrouekeur en Huisgenoot tydskrifte verskyn. Een van haar flitsverhale, Die Agterstallige Paaiement, het op die Vrouekeur se webtuiste verskyn en is ook aangewys as die wenverhaal vir April 2015.

Sy het ook die Roman Kursus asook die Gevorderde Roman Kursus by die SA Writers College in die Kaap susksesvol voltooi. Haar dosent en assessor was Wilna Adriaanse. Sy het tydens haar finale assessering die volgende opmerking gemaak:

Ronel was ‘n baie goeie student en dit was ‘n voorreg om saam met haar te werk. Haar finale teks is ‘n bewys van haar harde werk en toegewydheid. Ek glo sy beskik oor die talent om ‘n goeie manuskrip te kan skryf. My goeie wense vergesel haar op haar verdere skryfpad.”

Ná ’n slypskool wat Kobus Burger en Leon van Nierop aangebied het, kon sy nie anders as om ’n kans te waag nie. Sy het ongelooflik baie geleer en gou agtergekom dat radio ’n medium is waarvan sy baie hou en waaraan sy meer aandag sal wil gee.

Haar eerste RSG Radio drama “Bosluisie” is in Mei vanjaar uitgesaai en haar tweede drama “Spieëlbeeld” is geskeduleer om op 14 Desember vanjaar uitgesaai te word.

Alhoewel die spreekwoord lui van sit en staan kom niks gedaan, glo Ronel dat stilsit, veral voor ’n rekenaar, vir ’n skrywer van kardinale belang is. Ronel hou daarvan om by ervare skrywers kers op te steek en deurlopend te leer en te groei. Sy is lief vir skryf en is dankbaar vir elke geleentheid om dit te kan doen.

Die hele span van Spieëlbeeld.

Die storie agter Spieëlbeeld
Ronel skryf: “Ek word tans in my persoonlike lewe gekonfronteer met vriende wat teen kanker veg. Spieëlbeeld bevat ook só ’n element van hartseer. Dalk besef mense dat die lewe kort is. Dat ons elke dag moet gryp en die beste daarvan moet maak. Dat ons makliker moet vergewe en meer moet liefhê. Net leef. Dit is ’n voorreg!

Aan die ander kant het ek Spieëlbeeld ook baie geniet. Ons leef in ’n gebroke wêreld, maar met my skryfwerk kan ek nog “happy endings”skep en selfs daaraan vashou en daarin glo. Ek hoop dat die luister van Spieëlbeeld vir elke luisteraar ’n positiewe ervaring sal wees.”

Amanda Strydom, Donnalee Roberts en Cindy Swanepoel

Regisseursnota
Ek is gek oor liefdesverhale. Dit was dus ‘n heerlike uitdaging! Volgens my is Donnalee Roberts en Ivan Botha die perfekte held en heldin, veral na die sukses van hulle rolprente, Pad na jou hart en Vir Altyd.

Ek het die kans gewaag en gevra of hulle sal help om die kollig weer opnuut op radioteater te plaas deur my held en heldin te wees in Spieëlbeeld. Beide het ‘n groot liefde vir radio en het opsluit ingestem.

Gewoonlik word soen-tonele in radioteater gedoen deur akteurs wat hulle eie hande soen, maar met die dat Donnalee en Ivan in die werklike lewe verloof is het hulle ingestem om regtig te soen – ‘n eerste in radio.

Die res van die karakters word deur ewe bekende name in die bedryf vertolk. Amanda Strydom, Cindy Swanepoel, Karen Wessels, Eloise Cupido. Bronwyn van Gran en Mandi du Plooy-Baard.

Maak jou tuis vir ‘n heerlike, toon-omkrul-lekkerkry liefdesverhaal!

Nog dramas waarna jy kan uitsien

Donderdag 21 Desember: Sea Point Mansions deur Annemarie Roodbol

Sea Point Mansions deur Annemarie Roodbol handel oor die wel en wee van die woonstel- en winkeleienaars in ‘n gebou in Kaapstad. Sea Point Mansions is ‘n woonstelgebou in Kaapstad waar beide die inwoners asook die bestuurders van die ondernemings op die grondvloer mekaar van tyd tot tyd die hare invlieg. Elkeen het heelwat om te verloor, totdat hulle eendag besluit om die saak op die spits te dryf.

Donderdag 25 Desember (Kersdag): Die nag van die wyses deur Zenobia Kock (Argiefmateriaal)

Zenobia Kock (foto regs) se bekroonde Kersdrama, Die nag van die wyses, volg op Kersdag.

Hierdie pragtige, poëtiese verhaal handel oor ‘n wanaangepaste oujongnooi wat die wêreld van ‘n afstand beloer en boonop simptome van Asperger-sindroom toon. Maar dan gebeur iets wat haar buitengewoon laat optree en almal rondom haar verstom.

Donderdag 28 Desember: Sjarrap en eet jou kos! deur Ilné Fourie (Argiefmateriaal)

Die Bloemfonteinse verhoogaktrise en skrywer Ilné Fourie sluit die jaar af met die lekkerlag-drama, Sjarrap en eet jou kos! Die bekkige komedie handel oor al die komiese belewenisse van ‘n kelnerin. Kelners en kelnerinne is daagliks tot u diens. Tog moet hulle dikwels – indien nie uurliks nie – op hul tande byt vir die mees absurde versoeke en vereistes waaraan hulle moet voldoen. In hierdie bekkige komedie besluit die kelnerin om van tyd tot tyd wel ‘n bietjie wraak te neem…

Radioteater word van Oktober tot einde Desember elke Donderdag om 20:00 op RSG (100 tot 104 FM) uitgesaai. Die radiodramas word Maandagoggend tussen 01:00 en 02:00 in Deurnag herhaal.

Radiodramas wat reeds in die Oktober – Desember 2017 seisoen uitgesaai is.

Die Judasbok is met die toestemming van Human & Rousseau vir die radio verwerk.

Die regisseur is Eben Cruywagen.