‘Waar is Tomas’: Luister weer


Die seisoen het op Donderdag 28 Junie afgesluit met Waar is Tomas? deur die aktrise en skrywer Zoë Ras. Die drama is onder die spelleiding van Margot Luyt in Kaapstad opgevoer en is ‘n viering van en ode aan die letterkunde en woordkuns.

Die storie

Emma le Roux is ‘n jong versorger wat na ‘n bejaarde wewenaar, Giel Vermaak, moet omsien. Hulle verhouding is uit die staanspoor problematies. Tog kom Emma gou agter dat haar tydjies saam met Giel haar lewe handomkeer gaan verander.

Giel neem mettertyd vir Emma op verskeie avonture wat haar dwing om haar verbeelding op speels dog kragtige maniere te gebruik. Emma leer dat ‘n mens se verbeelding jou kan laat lag en huil, maar ook genees. En sy besef hoe belangrik die literatuur vir die mensdom in sy geheel is.

Die skrywer

Die dramaturg Zoë Ras is 25 jaar oud en woon in Johannesburg. Sy het haar eerste kortverhaal geskryf toe sy agt jaar oud was. Sy was al twee keer ‘n finalis in RSG en Sanlam se radiodrama-skryfkompetisie. Haar eerste vollengte-verhoogdrama is vroeër vanjaar in die PALI-kleinteater in Pretoria op die planke gebring.

Wanneer sy nie dramas, poësie of kortverhale skryf nie, is sy betrokke by haar verloofde se wildsplaas.

Die akteurs

Die hoofrolle in Waar is Tomas? word vertolk deur Frieda van den Heever (as Emma) en Carel Trichardt (as Giel).

Die ander spelers sluit in Dean Balie, Petru Wessels, André Weideman, Jumaine Hansen, Lise-Marie Richardson en Tarryn Wijngaard.

Die tegniese en akoestiese versorging is deur Cassi Lowers.

ROLVERDELING – Van links is Jumaine Hansen, Dean Balie, Frieda van den Heever, André Weideman, Lise-Marie Richardson, Carel Trichardt en Petru Wessels. Voor is Tarryn Wijngaard, Margot Luyt (regisseur) en Cassi Lowers (tegniese en akoestiese regisseur).

Van links is Dean Balie, Frieda van den Heever, André Weideman, Lise-Marie Richardson, Carel Trichardt en Petru Wessels. Voor is Jumaine Hansen, Margot Luyt (regisseur) en Tarryn Wijngaard.

RSG se tweede Radioteater-seisoen vir 2018 begin in Oktober en sal tot Desember 2018 duur. Van Julie tot September word RSG se dokumentêre seisoen elke Donderdag om 20:00 uitgesaai.

Radioteater word van April tot Junie elke Donderdag om 20:00 op RSG (100 tot 104 FM) uitgesaai. Die radiodramas word Maandagoggend tussen 01:00 en 02:00 in Deurnag herhaal.

DATUM TITEL
SKRYWER
REGISSEUR
30 Mrt 2018 Quintin Roy en die Paashaas Helena Hugo Helena Hugo
5 April Oorlewing – C-Blok Erica Harris Renske Jacobs
12 April Springgety Sophia van Taak Ronel Geldenhuys
19 April Vlerke vir Jason Janine van der Linde Margot Luyt
26 April Rommel, rommel Lee Doubell Eben Cruywagen
3 Mei ‘n Voorlopige begrafnis Albert Short Christelle Webb-Joubert
10 Mei ‘n Pophuis Henrik Ibsen Suzanne van Wijk
17 Mei KOP Schalk Schoombie Johan Rademan
24 Mei Hittegolf Martyn le Roux Anrich Herbst
31 Mei Skink vir my ‘n whisky Deon Johnston Eben Cruywagen
7 Junie Die gang Joe Kleinhans Bettie Kemp
14 Junie Kolskoot Visagie Christopher W. Joynt Renske Jacobs
21 Junie Die reine waarheid Eleanor Lombard Joanie Combrink
28 Junie Waar is Tomas? Zoë Ras Margot Luyt