Vanaand: treffers van Paul Simon


Die Midas van Musiek is die musiekreeks op Maandagaande. Dit is saamgestel en word aangebied deur Kobus Burger.

In die Griekse mitologie was Koning Midas geseën met ‘n besondere gawe – alles wat hy aangeraak het, het in goud verander.

As ‘n mens van popmusiek praat, was die maatstaf vir sukses dikwels goue status vir albumverkope. En tog is daar sangers, liedjieskrywers en selfs produksieleiers wat met die Midas-aanraking kon spog sonder dat hulle altyd daardie miljoene kortspelers of albums verkoop het.

Die kunstenaars wat Kobus Burger gekies het, toon almal hierdie spesiale goue aanraking in vertolking, liedjieskryfvernuf of sang, maar sonder dat hulle alslag die erkenning daarvoor geniet het.

Ontmoet en luister na die musiek van ‘n groep sangers, vertolkers en komponiste met die goue aanraking. Ons reis deur onder andere Griekeland, Indië, Amerika, Italië, Australië, die Kaap-Verdiese eilande en Brittanje – en nie altyd op soek na verbysterende plateverkope nie, maar ‘n kreatiewe tydloosheid wat hierdie groep kunstenaars die Midas-musikante van die popbedryf maak.

Luister Maandagaand

Paul Simon in 1973.

24 September 2018 (Erfenisdag), Episode 13 (slot)

Paul Simon

Die 76-jarige sanger-liedjieskrywer Paul Simon tree op Saterdag 22 September 2018 vir die heel laaste keer voor ‘n gehoor op, met die afsluitingskonsert van sy “Homeward Bound”-wêreldtoer. Ná ‘n loopbaan van meer as ses dekades gaan hy finaal die tuig as uitvoerende kunstenaar neerlê.

In die slot-episode van ‘Die Midas van Musiek’ is daar treffers van Simon & Garfunkel tot treffers van Paul Simon se “Graceland”-album waarop o.a. Ladysmith Black Mambazo, Ray Phiri, Youssou N’Dour en Linda Ronstadt gehoor kan word.

Simon is deur die nuustydskrif Time aangewys as een van die “100 People Who Shape Our World”. Na meer as vyf dekades neurie mense steeds sy treffers. Skuif nader vir ‘n program propvol erfenis-klanke en nostalgie.

 


 

Het jy geweet?

Nina Simone

Bob Dylan het na haar verwys as ‘dinamiet’, terwyl Roger Caras gesê het sy is ‘n ‘Sondagskoolpiekniek’. Tog is Nina Simone alombekend as “The High Priestess of Soul”.

Die Hollywood-klankbaankomponis Hans Zimmer het ‘n spesiale sintetiseerder gebou om die klankbaan vir die ‘Batman’-fliek “The Dark Knight Rises” te komponeer. Uit eerbied en bewondering vir Giorgio Moroder, oftewel die Vader van Disko, het hy die sintetiseerder “Giorgio” gedoop.

Hierdie is net ‘n paar van die interessante musiekfeite in RSG se Maandagaand-musiekreeks, Die Midas van Musiek.

Kunstenaars wat reeds op die program bekend gestel is

Nina Simone, Giorgio Moroder (Looky Looky is seker van die bekendstes), Peter Gabriël, KD Lang, Louis Armstrong (kyk onder), Roberta Flack (kyk onder), Suzanne Vega (kyk onder), Sam Cooke (kyk onder), George Michael (kyk onder), Shirley Bassey, Rod McKuen en Annie Lennox.

17 September 2018, Episode 12

Annie Lennox & The Eurythmics

 Die Blonde Skot met die androgene voorkoms – bekend as Annie Lennox – is deur die videokanaal VH1 gekroon as “The Greatest White Soul Singer Alive”.

In die voorlaaste episode van Die Midas van Musiek reis ons deur Lennox se loopbaan – van haar dae saam met Dave Stewart as The Eurythmics, tot haar solo- en filantropiese werk. Daar is ook ‘n liedjie wat sy saam met 23 van die wêreld se voorste vrouesangers (soos Celine Dion en Madonna) opgeneem het. Van die ander gaskunstenaars sluit in Aretha Franklin en die jazzpianis Herbie Hancock.

Eurythmics: Annie Lennox en Dave Stewart

10 September 2018, Episode 11

Rod McKuen

Rod McKuen is deur Newsweek beskryf as die “Koning van Kitsch”. En tog het die ontslape digter W.H. Auden sy digkuns as “liefdesbriewe aan die wêreld” beskryf.

Bekend om sy werk saam met Jacques Brel aan immergroen treffers soos “Seasons in the Sun”, was McKuen veel meer as liedjieskrywer, komponis en digter. Van Madonna tot Frank Sinatra het sy liedjies opgeneem en van sy versamelde gedigte is meer as 65 miljoen eksemplare verkoop. Simpel en oppervlakkig? Skakel in en oordeel self.



Dame Shirley Bassey in haar jong dae

3 September 2018, Episode 10

Dame Shirley Bassey

 Die eerste keer toe sy applous gehoor het, het Dame Shirley Bassey (81) geweet sy is ‘n sangeres. Vandag spog sy met ‘n loopbaan van meer as ses dekades lank en boonop drie James Bond-temaliedere. Reis saam met die “tierkat van Tiger Bay” deur van haar loopbaan se musikale hoogtepunte en hoor wat sy te sê het oor die eietydse popdivas wat eintlik oor háár skouer geloer het…

Dame Shirley Bassey





GEORGE MICHAEL. Foto: Chris Cuffaro/Courtesy of SHOWTIME

27 Augustus 2018, Episode 9

George Michael

 Liam Gallagher, hoofsanger van die popgroep Oasis, het die sanger-liedjieskrywer George Michael as die “Modern Day Elvis” geloof.

Die Britse popster was nie net ‘n sanger en produksieleier nie, maar ook ‘n filantroop en het gespot dat hy ‘n kruis tussen Tom Jones en The Supremes is.

Met verkope van meer as 115 miljoen albums word hy steeds gereken as een van Brittanje se topverkoper-musikante tot nog toe.




 

20 Augustus 2018, Episode 8

Sam Cooke

Sam Cooke

Die bokser Muhammad Ali (alias Cassius Clay) het hom die wêreld se grootste rock ‘n roll-sanger genoem.

Sam Cooke word steeds gereken as die “Koning van Soul-musiek”, maar het ook diep spore in die pop- én rockbedryf getrap.

Sy groot treffer “You Send Me” het boonop Elvis Presley se “Jailhouse Rock” uit die no. 1-posisie in die treffersparades geskop. Hierdie program bevat 15 van Sam Cooke se grootste treffers.



13 Augustus 2018, Episode 7

Suzanne Vega

Suzanne Vega

Die sangeres en liedjieskrywer Suzanne Vega het die loopbane van kunstenaars soos Tracy Chapman beïnvloed en word steeds onthou as die “Moeder van die MP3”.

Haar platemaatskappy het verwag dat sy skaars 30 000 eksemplare van haar debuutalbum sou verkoop, maar sy sit toe meer as ‘n miljoen albums van die hand.

Die 59-jarige Amerikaner word vandag nog gereken as een van die briljantste liedjieskrywers van haar generasie…


6 Augustus

Roberta Flack



30 Julie


‘n Jong Louis Daniel Armstrong