Nuwe reeks oor balletmusiek begin 5 April


Op Sondag 5 April begin ‘n nuwe musiekreeks op RSG – Uitnoding tot die Dans – aangebied deur Wouter de Wet. Die reeks sal uit dertien programme van balletmusiek bestaan, van Romantiese Russiese musiek van die 19de eeu tot die moderne Amerikaanse balletmusiek van Aaron Copland en Leonard Bernstein.

Wouter, wat elke Sondagaand Dis Opera vir RSG versorg, vertel dat sy liefde vir balletmusiek ‘n lang pad kom.

Wouter de Wet

Wouter de Wet

“Kyk, toe ek nog op skool was in Windhoek”, vertel hy, ” het ek nogal goed klavier gespeel, en daarom het ‘n plaaslike balletskool my gevra om klavier te speel terwyl die balletmeesteres klas gee. So het ek nie net ‘n gesonde belangstelling in ballet gekry nie, maar ook op dié manier my sakgeld verdien!

“Op universiteit in Kaapstad het ‘n oulike niggie van my deel geword van die balletgeselskap en ek het gereeld haar klasse gaan bywoon. Later jare, toe ek musiekkritikus by die destydse koerant Die Transvaler was, het die balletportufeulje ook skielik my kant toe gekom, en ek het ure en ure by TRUK se balletskool in Claimstraat deurgebring, met balletdansers bevriend geraak en lank en lekker gesels oor dié wonderlike kunsvorm”.

Hy maak dit duidelik hy is g’n fundi nie – net iemand wat lief is vir ballet, veral die pragtige musiek wat daarmee saamgaan. En wat hy graag met RSG se luisteraars wil deel.

Uitnodiging tot die Dans sal Sondagoggende net na tienuur op die lug wees, tot skuins voor elf.

Luister na ‘n uittreksel uit die eerste program: UITNODIGING TOT DIE DANS.