Nuusbrief 31 Julie 2018: Magdaleen sê


Die orrel tydens restourasie

Magdaleen Kruger, stasiebestuurder van RSG skryf:

“Gegroet hier vanaf my lessenaar in Radiopark hier in Auckland Park. Goeie nuus vir almal wat al navrae gerig het… ja, RSG Skatkis gaan weer aangebied word, en wel in November.

Ons gaan die SAUK se gerestoureerde en blinkgepoetse orrel inwy as deel van RSG Skatkis. Ek wil nou nie spog nie, maar RSG was ‘n groot dryfveer agter die restourasie-proses. ‘n Paar jaar gelede, met ons eerste RSG Kunstefees op lug, wou ons ‘n groot orrelwerk insluit. Toe kom ons agter die orrel werk al vir jare nie meer nie; dit sal eers herstel en gerestoureer moet word. RSG en ons kollega Suzette Lombard van die klassiekemusiek-biblioteek hier by die SAUK, het toe die wiel aan die rol gesit; die sakeplan en begroting is voorgelê en goedgekeur. En nou is ons gereed om die orrel in te wy, met ‘n groot orkes en al. En dis al wat ek vir eers kan uitlap.

Die inwyding van die orrel

Die orrel sal in November op ‘n konsert as deel van RSG Skatkis se programme ingewy word.

Sodra ons gereed is met al die finale reëlings van RSG Skatkis wat vir November beplan word, sal die besonderhede op lug en ander mediums bekend gemaak en adverteer word.  Luisteraars sal dan uitgenooi word om hul plekke te bespreek.

 

Groete vir eers,
Magdaleen en die RSG-span