RSG se Vrae en feite vir nuuskierige agies #2, nou te koop


‘n Nuwe boek uit die RSG-stal, Vrae en feite vir nuuskierige agies #2, saamgestel deur Riette Hugo, is nou in boekwinkels te koop.

Is jy ’n nuuskierige agie wat wil weet of dinosourusse ooit gekloon sal word? Of hoeveel verf nodig is om ’n Boeing in sy kleure uit te dos? Het jy al gewonder hoekom kruisies soene simboliseer? Of waarom mans vandag steeds dasse dra? Bestaan daar nog regte hekse? En het mense mekaar met blomme gegooi tydens die Tulpoorlog?

Hierdie boek sal jou help om uit te vind of jy bietjie slimmer is as ’n sjimpansee – of dalk baie intelligenter as ’n neurochirurg! Dit gee ook wenke oor hoe om ’n entrepreneur te word. En dit vertel jou alles oor hoe DNS die eerste keer gebruik is om ’n moordenaar vas te trek.

Die legendariese opvoedkundige Riette Hugo het vir RSG antwoorde op dié vrae, en nog vele meer, saamgestel. Vrae en feite vir nuuskierige agies #2 is propvol inligting, riglyne en wenke vir kinders van alle ouderdomme wat slimmer as selfs Oupa en Ouma is.

Waarskuwing: Moenie jou boek uitleen nie! Dalk kry jy dit nooit weer terug nie.

Riette Hugo is ’n veteraan in die veld van opvoedkunde en ’n gerespekteerde eksaminator. Sy was vir 48 jaar onderwyser en het verskeie taalhandboeke en studiegidse geskryf. Van kleins af kon sy nie genoeg kry van interessante stories oor ons leefwêreld nie.