‘Die Judasbok’ oor liefde, ras en herkoms


Dalene Matthee (Foto: Beeld)

Donderdag 22 November: Die Judasbok deur Dalene Matthee
‘n Kortverhaal van Dalene Matthee, geliefde skrywer van romans soos Fiela se kind en Kringe in ’n bos, is vir die radio verwerk en kan op Donderdag, 22 November, om 20:00 op RSG in Radioteater gehoor word. [Hierdie is ‘n argiefdrama en heruitsending.]

Dit is reeds bekend dat die karakters in Matthee se werk gekenmerk word deur ’n soeke na identiteit. En die verhouding tussen ras en identiteit, en hoe herkoms, ras en omgewing daardie identiteit ten nouste raak.

Die storie
Die kortverhaal Die Judasbok wat deur Anton Treurnich vir RSG verwerk is, handel oor ʼn jong bruin man wat in die jare tagtig verlief raak op ’n wit onderwyseres. Weens die apartheidswetgewing, is hulle verhouding nie net gedoem nie, dit is selfs onwettig en dus strafbaar.

Die paartjie beplan om hulle in Londen te gaan vestig, maar eers wil die jongman sy ma, ’n kombuishulp op ’n plaas in die Klein-Karoo, gaan groet. Sy besoek het verreikende en onvoorsiene gevolge vir al die betrokkenes…

Regisseursnota
Die regisseur Eben Cruywagen sê die kern van die vraagstuk in dié radiodrama was vir hom: Moet Ma Bet se vrede en geloof in haar medemens bewaar word? Moet sy in haar onskuld die verhouding met haar geliefde Mies Hettie en Baas Piet behou, of moet sy die koue werklikheid van die onreg van apartheid ontdek? Is dit haar reg om die waarheid te ontdek, of is dit vir haar menswees en haar kinderlike geloof in God beter om ongesteurd met haar lewe op Wolwedans voort te gaan? Hoe die klimaks benader word t.o.v. vertolking en inkleding, is dus van kritieke belang.

Die Judasbok bevat taalgebruik en temas wat sensitiewe luisteraars mag aanstoot gee.

Die spelers

June van Merch

Bet – June van Merch

Susanne Beyers

Mies Hettie – Susanne Beyers

Dean Balie

Jong Karel – Dean Balie

Daneel van der Walt

Lillian – Daneel van der Walt

Die Judasbok is met die toestemming van Human & Rousseau vir die radio verwerk.