Donderdagaand: die Wendrama!


‘n Klassieke drama wat meer as 200 jaar oud is, ‘n splinternuwe radioverwerking van een van Pieter Fourie se verhoogstukke asook ‘n groot gerf wendramas is in RSG se eerste Radioteater-seisoen vir 2019 ingesluit.

Radioteater word van April tot Junie elke Donderdag om 20:00 op RSG (100 tot 104 FM) uitgesaai. Die radiodramas word Maandagoggend tussen 01:00 en 02:00 in Deurnag herhaal.

Donderdag 2 Mei – Sophia van Taak se Anders geveer.

Sophia van Taak

Die algehele wenner van verlede jaar se radiodrama-kompetisie volg op Donderdag 2 Mei – Sophia van Taak se Anders geveer.

Luisteraars sal Van Taak se aangrypende Springgety onthou, wat in die vorige kompetisie die derde plek ontvang het.

Die storie: ’n Sewentienjarige seun wat aan Aspergersindroom ly, vind hoop en motivering in ’n buitengewone vriendskap wat uiteindelik ook tot die redding van sy enkelouer-ma kom. Sy ma voer ‘n stryd om oorlewing en bedryf ‘n tuisbakkery om kos op die tafel te hou. In ‘n nuwe woonbuurt raak hy bevriend met ‘n korrelkop-duiweboer, maar die vriendskap neem skielik ‘n tragiese wending.
Die spelers: Die rolle word vertolk deur De Klerk Oelofse, Erica Wessels, Charl van Heyningen, Frieda van den Heever, Roeline Daneel, Leon Kruger en Neels Coetzee.

9 Mei: Wilhelm Tell deur Friedrich Schiller

Friedrich Schiller se Wilhelm Tell met onder andere Patrick Mynhardt in die rolverdeling is ‘n argiefdrama wat deur Jacques Loots geregisseer is. Hierdie tydlose verhaal word op Donderdag 9 Mei uitgesaai. Schiller sou vanjaar 260 jaar oud wees

16 Mei: Klippe wat val deur Philip Rademeyer

Dean John Smith

Wilhelm van der Walt

Die dramaturg en regisseur Philip Rademeyer se Klippe wat val het die afgelope jaar tydens verskeie kunstefeeste opslae gemaak en teaterpryse ingepalm. Eben Cruywagen het dit vir die radio verwerk en dit debuteer op Donderdag 16 Mei om 20:00 op RSG met Ronel Geldenhuys as regisseur.

Dean John Smith en Wilhelm van der Walt is albei met kykNET Fiësta-pryse bekroon vir hul vertolkings en sal in die radiodrama gehoor word met Susanne Beyers en June van Merch wat die rolverdeling voltooi.

23 Mei: Ouma op haar besem, deur Annika Swanepoel

Dan volg Annika Swanepoel se Ouma op haar besem met spelleiding deur Anrich Herbst.

Annika Swanepoel was ‘n finalis in die RSG/Sanlam Radiodrama Skryfkompetisie van 2017.

Die storie: Die liefde tussen twee jongmense kom te staan voor ‘n toets van ouerdruk en vorige verhoudings.

Wanneer Marinda – die duikinstruktriese, en Jay-Z – die sakeman wat eintlik wil skilder, se liefde in gedrang kom, deel Marinda se Ouma ‘n belangrike les met Jay-Z se beherende ma. Maar sal dit genoeg wees om hulle liefde te red, en sal Jay-Z mans genoeg wees om te veg vir die een waarvoor hy lief is?

‘n Woord van die regisseur

Die jaarlikse RSG/Sanlam Radiodrama Skryfkompetisie is ‘n wonderlike platvorm om nuwe skryftalent te ontgin, en met ‘n bietjie slyp lewer dit tekste wat dramas van uitsaaigehalte word. Vir ‘n regisseur is dit ‘n voorreg om ‘n werk op te voer wat deur die luisteraar positief beleef kan word.

‘n Wonderlike ervaring van die radiodrama genre is wanneer die teks as’t ware “lewe kry” wanneer die akteurs voor die mikrofoon inskuif. Dit was inderdaad ook die geval met Annika Swanepoel se drama, Ouma op haar Besem. Die uitdaging vir my as regisseur was om aan die soms vreemde optrede van die karakters, wat eintlik tog so eg aan die mens se kondisie is, geloofwaardigheid te verleen.

Die Spelers: June van Merch (OUMA), Liandé Valentyn (MARINDA), Wilhelm van der Walt (JAY-Z), Isadora Verwey (IONA), Karli Heine (SUNE), en Mariechen Vosloo (AMY).

30 Mei: Karel se oupa, deur Retief Scholtz

Tobie Cronjé en Ian Roelofs in Retief Scholtz se drama, Karel se oupa.

Tobie Cronjé vertolk die titelrol in Retief Scholtz se Karel se oupa, nog ‘n verhoogstuk wat vir die radio verwerk is. Christelle Webb-Joubert is die regisseur.

6 Junie: Erfporsie deur Ronel Mostert

Ronel Mostert se Erfporsie gaan vir heerlike komiese vermaak sorg.

Amor Tredoux gaan die spelleiding van Erfporsie behartig,

13 Junie: Afkoeling deur Martyn le Roux

Martyn le Roux se Afkoeling gaan ook die lagspiere prikkel.

Kobus Burger is die regisseur vir Afkoeling, die opvolg van die uiters gewilde Hittegolf.

James Borthwick, Elize Cawood, Franci Swanepoel, Kaz McFadden, Mandi Baard, Duncan Johnson en Denver Vraagom vertolk die rolle in dié donker komedie.

20 Junie: Gert Garries – ‘n Baasiekel Blues, deur Pieter Fourie

Pieter Fourie, voormalige hoofdirekteur van die KKNK en ontvanger van die Hertzogprys vir sy drama-oeuvre, is later vanjaar 79 jaar oud. Sy verhoogstuk Gert Garries – ‘n Baaisiekel Blues is in 2002 tydens die KKNK opgevoer en tree in gesprek met Ettienne Leroux se roman, Magersfontein, O Magersfontein. Johan Rademan voer dit vir die radio op.

Die plaaswerker Gert Garries ry vir drie dae met die verbrande liggaam van sy kind op sy fiets rond. Hy wil ’n doodsertifikaat bekom, ’n voorvereiste voordat hy die kind kan begrawe. Weens sy velkleur word hy egter deur die burokrate van bakboord na stuurboord gestuur. Na sy ontmoeting met Le Grange, ’n empatiese verkeersbeampte, ontstaan ’n sonderlinge verhouding tussen hulle. Hierdie verhouding suggereer ’n beter toekoms en menslike identiteit vir Gert, terwyl die kind simbool word van ’n bitter en wrang verlede. Eindelik begrawe Gert sy kind saam met die room van die Engelse.

Gert Garries word ook later vanjaar deur Protea Boekhuis gepubliseer.

27 Junie: Besoek van die grensbreker, deur Manie Groenewald

Die seisoen word op Donderdag 27 Junie afgesluit met Besoek van die grensbreker deur Manie Groenewald en spelleiding deur Mari Snyman. Dit is ‘n sterk drama oor vroue. Drie susters word met hul verlede en verbrokkelde verhoudings gekonfronteer wanneer hul ma sterf. ‘n Vreemde man se besoek vertrap al die grense tussen hulle en die werklikheid…

Die Radiodrama-skedule in ‘n neutedop:

DATUM TITEL SKRYWER REGISSEUR
4 April Liewe Pynappel
Anna Greenfield Frieda van den Heever
11 April Ontruim
Esta Steyn Helena Hugo
18 April

 

Die Selle
Herman Cronjé Renske Jacobs
GOEIE VRYDAG
19 April
Die Prokurator van Judea
Frieda de Villiers Helena Hugo
25 April Suidoosterfees-konsert
2 Mei Anders geveer
Sophia van Taak Joanie Combrink
9 Mei Wilhelm Tell
Friedrich Schiller Jacques Loots
16 Mei Klippe wat val Philip Rademeyer Ronel Geldenhuys
23 Mei

 

Ouma op haar besem Annika Swanepoel Anrich Herbst
30 Mei Karel se oupa

Retief Scholtz Christelle Webb-Joubert
6 Junie Erfporsie
Ronel Mostert Amor Tredoux
13 Junie Afkoeling
Martyn le Roux Kobus Burger
20 Junie Gert Garries – ‘n Baaisiekel Blues Pieter Fourie Johan Rademan
27 Junie

 

Besoek van die grensbreker Manie Groenewald Mari Snyman