COVID-19 in wêreld: gevalle en sterftes verdubbel binne 9 dae


Die jongste nuus en syfers oor COVID-19 in die wêreld

Die VSA is tans die episentrum van COVID-19, maar die aantal nuwe gevalle styg steeds vinnig in Spanje. Lees hier alles oor die globale syfers, in watter lande die syfers steeds styg, watter lande die siekte onder beheer begin kry, en die stappe wat in verskillende lande geneem word om COVID-19 hok te slaan. Lees ook die jongste oor die ontwikkeling nuwe, vinniger toetsmetodes en navorsing om ‘n entstof te vind. Ons bring jou die nuus soos dit ontvou.

8 April: COVID-19 neem steeds toe. die totale aantal gevalle en sterftes het die afgelope 9 dae verdubbel tot meer as 1,4 miljoen, met meer as 82 000 sterftes. Maar dubbeld meer mense het ook herstel en die aantal hersteldes staan op meer as 300 000.

30 Maart 2020:
Daar was sedert die uitbreking van die coronaviruspandemie ‘n merkbare verbetering in die lugkwaliteit in Europese stede waar daar ‘n staat van inperking geld. Lugfoto’s deur die Europese ruimteagentskap toon dat die stede Brussel, Parys, Madrid, Milan en Frankfurt het almal wesentlike laer stikstofvlakke aangemeld sedert inperkingsmaatreëls afgekondig is.

Suid-Korea is die jongste Asiese land wat beperkings plaas op mense wat die land binnekom te midde van kommer oor ‘n nuwe vlaag coronavirusinfeksies van die buiteland. Van 1 April af, sal alle mense wat die land binnekom, verplig word om vir 14 dae in kwarantyn te gaan. Suid-Korea was grootliks suksesvol om die oorspronklike uitbreking van die virus te beperk, maar sê meer as die helfte van die nuwe gevalle, op ‘n daaglikse basis, is afkomstig van ander lande. Suid-Korea het meer as negeduisend-500 Covid-19 gevalle, met die dodetal wat reeds 150 verbygesteek het.

29 Maart 2020:

Die Amerikaanse farmaseutiese maatskappy Abbott Laboratories het ‘n nuwe coronavirustoets ontwikkel wat binne vyf minute ‘n positiewe resultaat kan bevestig. ‘n Negatiewe resultaat word ná 13 minute bevestig. Abbott is van plan om die toets-toestel teen volgende week te versprei en sal sowat 50 duisend eenhede per dag vervaardig.

Lees meer: Só werk die virus –  Wat die virus doen, hoe dit aansteek en die voorsorgmaatreëls wat jy kan tref.

Die lys van lande waar COVID-19 die vinnigste toeneem

Die aantal nuwe gevalle neem die vinnigste toe in Spanje, gevolg deur Iran, die VK, België, Nederland, Portugal, die VSA en Switserland. (Sien tabel).

Die dodetal weens die corona-uitbreking in Italië het tot meer as 10000 gestyg. Volgens amptenare is 890 mense die afgelope 24 uur weens die virus dood. Dit is die tweede hoogste daaglikse syfer sedert die pandemie in Februarie uitgebreek het.

Die aantal mense wat die coronavirus regoor die wêreld opgedoen het het tot bykans 650000 gestyg. Die dodetal staan op meer as 30000. Meer as 2000 mense het weens COVID 19 reeds in Amerika gesterf, waar sowat 122000 gevalle aangemeld is. Dit is die hoogste syfer ter wêreld. President Donald Trump het dit oorweeg om New York, New Jersey en die staat Connecticut in afsondering te plaas in ‘n poging om die verspreiding van die virus te keer. Hy het egter afgesien van die plan nadat hy met die goewerneurs van die drie state en die Withuis se corona-taakspan onderhandel het.

28 Maart 2020: Byna 600 000 gevalle wêreldwyd.

Van die byna 600 000, is slegs sowat 82 000 in China.

Die VSA het nou die meeste gevalle, gevolg deur Italië.

Die gevalle in Duitsland is vinnig aan die toeneem, maar die sterftekoers bly steeds laag en baie laer as in Italië. Kyk na vandag se tabel hieronder.

 

Die lande met die meeste gevalle van COVID-19. Italië, Spanje en Switserland het die hoogste COVID-koerse, wat beteken dat ‘n groter persentasie van dié bevolkingsgroepe siek word. Italië en Spanje het die hoogste sterftekoers. meer as 60 keer meer mense sterf in dié twee lande vergelyking met hul bevolkings as in in China.

Kyk hoe die getalle in China, Italië, die VSA en Suid-Korea  toeneem/afneem

China: Die boonste grafiek toon hoe daar elke dag minder en minder nuwe gevalle van COVID-19 is. Die skielike onlangse piek is nadat mense van die buiteland in China aangekom het en weer van die buiteland die virus die land ingebring het. Die onderste grafiek toon duidelik dat die aantal mense wat steeds siek is, aanhoudend afneem.

Italië: Die boontste grafiek toon dat die aantal nuwe gevalle per dag net nie wil begin daal nie, en die onderste grafiek toon dat die aantal mense wat steeds siek is, steeds toeneem.

VSA: Die boonste grafiek toon hoe die aantal nuwe gevalle per dag vinnig toeneem, en die onderste grafiek toon dat die aantal siekes ook steeds toeneem.

Suid-Korea. Dié land word naas die groot sukses van Taiwan, ook as ‘n model voorgehou oor hoe om die pandemie vinnig onder beheer te bring. Die aantal nuwe gevalle neem af en bly laag, en die aantal siekes neem af.

Kyk hoe briljant het Taiwan die verspreiding van die virus gekeer. Die eerste geval is op 20 Januarie aangemeld, en sedertdien was daar slegs 267 gevalle en 2 sterftes.

27 Maart 2020: Die VSA het nou meer gevalle as China.

26 Maart 2020: Wêreldwyd staan die aantal gevalle op meer as 515000, met meer as 23000 sterftes.

Die President van Botswana, Mokgweetsi Masisi, het sy burgers gewaarsku om ook voorbereidings te tref vir ‘n inperkingstydperk. Masisi is self in afsondering vir veertien dae ná ‘n besoek aan Namibië. Drie gevalle van Covid-19 is tot dusver in Namibië aangemeld. Die regering van Botswana glo dat daar ‘n geringe kans vir oordrag is, maar is bekommerd oor die min toetse wat tot dusver gedoen is. Masisi sê die inperkingstydperk is op aanbeveling van mediese kenners. Hy sê beperkings op burgers se bewegings sal die regering in staat stel om moontlike gevalle op te spoor en te behandel.

Die lande met die meeste gevalle van COVID-19

Iran het ‘n interstedelike reisverbod ingestel te midde van vrese dat ‘n tweede vlaag van coronavirus-infeksies die land kan tref. Iran is die Midde-Oosterse land wat die ergste deur die pandemie geraak word. Mense wat vir die Irannese Nuwejaarsvakansie gereis het, moet onmiddellik na hul stede terugkeer. Die sluiting van universiteite en skole, asook die verbod op byeenkomste, is verleng.

Brittanje sê Prins Charles het nie op voorregte aangedring om vir die Coronavirus getoets te word toe hy simptome begin toon het nie.

Só lyk die steeds stygende grafieke op 26 Maart 2020.

Clarence House sê hy het positief getoets vir Covid-19, maar dat hy verder goeie gesondheid geniet. Hy en sy vrou, Camilla Parker-Bowles, is tans in afsondering in Skotland. Daar was kritiek toe dit bekend geword het dat die troonopvolger getoets is terwyl mediese werkers nie getoets is nie.

25 Maart 2020: Wêreldwyd staan die aantal gevalle op meer as 435 000, met byna 20 000 sterftes.

Leiers van die Groep van 20 groot nywerheidslande gaan môre ‘n virtuele beraad hou in reaksie op die wêreldwye coronaviruspandemie wat in baie lande steeds toeneem. Nieu-Seeland is die jongste land wat ‘n noodtoestand afgekondig het.
Wêreldwyd is daar nou meer as 420-000 bevestigde gevalle, met meer as 18-000 sterftes.

Die Wêreldgesondheidsorganisasie waarsku intussen dat Amerika die volgende brandpunt van die pandemie gaan wees waar daar ‘n skerp toename is van die siekte. In die deelstaat New York is daar meer as 25-600 gevalle en 210 sterftes. Die totale bevestigde gevalle in Amerika is nou meer as 55-duisend, met nagenoeg 800 sterftes. New York se strate is feitlik verlate, hoewel die kurwe van die uitbreking steeds styg.

18 Maart 2020: SA = 116 gevalle.

Die lande met die meeste aktiewe gevalle op 18 Maart 2020. Bron: https://www.worldometers.info/coronavirus/

17 Maart 2020: Die Covid-19 pandemie is steeds besig om vinnig uit te brei, veral in Europese lande.

Die aantal bevestigde gevalle het sedert 2 Maart van sowat 90 000 binne 15 dae verdubbel. Dit het 22 dae geneem om van 45000 tot 90 000 te verdubbel.

In Suid-Afrika staan die getal bevestigde gevalle op 64, terwyl dit ook in al meer lande in Afrika voorkom.

In China het meer as 68 000 van die net meer as 80 000 siek mense reeds herstel en is slegs 21 nuwe gevalle die afgelope 24 uur aangemeld, terwyl Italië, Spanje, Duitsland, Frankryk, Switserland, Engeland, België, Nederland, Oostenryk en die Skandinawiese lande en ook die VSA nou die meeste nuwe gevalle aanmeld. Die virus het nou ook die Karibiese eilande bereik.

Die gevalle buite China op 5 Maart 2020 tot die wêreldtotaal op sowat 90000 gestaan het

Die gevalle buite China op 16 Maart, toe die totale aantal gevalle in die wêreld dubbeld so hoog geword (byna 180000) het as op 5 Maart se 90000.

China se department van buitelandse sake het burgers aangeraai om nie na lande te reis wat ‘n hoë risiko vir die coronavirus het nie. Chinese word gewaarsku teen reise na onder meer Europa, Amerika en Iran. China het ook maatreëls verskerp om te verhoed dat nuwe infeksies die land binnekom.

Interessantheidshalwe:

 

Die siekte staan bekend as COVID-19 (Corona Virus Disease 2019), en die virus staan bekend as SARS-CoV-2 (Serious Acute Respiratory Syndrome Corona virus 2), omdat die virus ernstige longonsteking veroorsaak en volgens alle aanduidings naby verwant is aan die SARS-CoV-1 van 2002/2003.
Lees meer: https://www.who.int/emergencies/diseases/novel-coronavirus-2019/technical-guidance/naming-the-coronavirus-disease-(covid-2019)-and-the-virus-that-causes-it

Byna netsoveel mense het al herstel van COVID-19 as wat tans siek is. Sowat 8% van die afgehandelde gevalle het gesterf, en tans is sowat 7% van dié wat steeds aktief siek is, kritiek siek. Die twee grafieke toon dat die aantal nuwe siekes en nuwe sterftes steedd daagliks vinning toeneem. In China het die meeste mense reeds herstel en is die aantal nuwe gevalle en sterftes duidelik aan die afneem.

Nog 368 mense is in Italië dood weens die coronavirus, die hoogste syfer vir ‘n enkele dag. In Lombardy, die gebied wat die ergste geraak word, het 252 mense gesterf. Intussen het Duitsland tydelik beheer by grensposte na Frankryk, Switserland en Oostenryk aangekondig. Dit tree vandag in werking. Ander lande van die Europese Unie het ook drastiese maatreëls in werking ingestel. In Oostenryk word byeenkomste van meer as 5 mense van vandag verbied. Skole in Nederland is tot Maandag 6 April, gesluit. Dit volg op streng maatreëls wat Frankryk en Spanje Saterdag ingestel het.

13 Maart 2020: Kenia het alle massa-byeenkomste opgeskort nadat ‘n persoon wat vanaf Amerika via Londen gereis het, positief getoets het vir die Coronavirus. Daar is meer meer as honderd bevestigde gevalle in Afrika waaronder Egipte, Algerië en Kameroen. In Suid-Afrika is sestien gevalle aangemeld.

Die situasie op 13 Maart 2020 volgens die WGO. https://experience.arcgis.com/experience/685d0ace521648f8a5beeeee1b9125cd. Vergelyk dié grafiek met die soortgelyke grafieke na onder in die artikel.

Die VSA se reisverbod na en van lande geld vir verskeie lande. Besoek die webwerf vir ‘n interessante uiteensettiing van COVID-19 inligting: https://www.bbc.com/news/world-51235105

12 Maart: Amerika het hom daartoe verbind om sowat agt miljoen rand aan die Suid-Afrikaanse regering beskikbaar te stel om te help met die hantering van die COVID-19 pandemie. Amerika het intussen ‘n reisverbod van 30 dae vanaf Europa ingestel, nadat meer as duisend Amerikaners positief vir die siekte getoets het.

Die Minister van Gesondheid, Zweli Mkhize sal vandag met die provinsiale werkkomitee in Limpopo vergader om hulle op hoogte te bring van die proses om 122 Suid-Afrikaners uit die Chinese stad Wuhan na Suid-Afrika terug te bring. Sewe van die Suid-Afrikaners is van Limpopo afkomstig.

11 Maart: Is daar meer as een stam van die virus wat COVID-19 veroorsaak? Lees: https://www.newscientist.com/article/2236544-coronavirus-are-there-two-strains-and-is-one-more-deadly/

‘n Britse junior minister van Gesondheid en parlementslid, Nadine Dorries, het positief getoets vir die coronavirus. Dorries is die eerste Britse parlementslid wat Covid-19 opgedoen het en is in self-afsondering by die huis.

10 Maart: Die minister van gesondheid, Zweli Mkhize, het bevestig dat die getal Suid-Afrikaners wat die virus onderlede het, tot sewe gestyg het, nadat ‘n bykomende vier mense positief gediagnoseer is. Hulle was deel van die groep van tien wat Italië besoek het. Italië is die land in Europa wat die meeste gevalle van Covid-19 het.

Dit is duidelik dat volgens die aantal nuwe gevalle wat per dag aangemeld word, China besig is om die stryd te wen, dat die aantal nuwe gevalle in Iran en Suid-Korea ook aan die verstadig is, maar dat dit nog die geval in Italië, Spanje, Amerika en Frankryk is nie. Dit lyk of die kans op oorlewing die hoogste is in Duitsland.

Die Italiaanse eerste minister, Giuseppe Conte gaan vandag ‘n dekreet uitvaardig genaamd, “Ek bly tuis”.

5 Maart 2020: Die Nasionale Instituut vir Oordraagbare siektes het die eerste geval van die Corona COVID-19 virus in Suid-Afrika bevestig. Die Minister van Gesondheid, Zweli Mkhize, het in ‘n verklaring bekendgemaak dat ‘n 38-jarige man die virus het. Hy en sy vrou het in Italië gereis. Hulle was deel van ‘n groep van tien mense wat op 1 Maart na Suid-Afrika teruggekeer het. (Lees meer: https://www.news24.com/SouthAfrica/News/breaking-sas-first-positive-case-of-covid-19-confirmed-20200305) en https://www.news24.com/SouthAfrica/News/live-coronavirus-in-south-africa-all-the-latest-news-and-updates-20200305

Die statistieke soos op 5 Maart 2020.

Vergelyk die kaart met die soortgelyke een onder.

4 Maart 2020: ‘n Groot aantal nuwe gevalle is in Iran, Suid-Korea, Duitsland, Spanje en Switserland aangemeld.

Die lande met die meeste gevalle op 5 Maart 2020.

Vergelyk die kaart met die soortgelyke een van die WGO onder.

3 Maart 2020: Al meer kongresse en byeenkomste in Europa en die Midde-Ooste word nou ook gekanselleer. COVID-19 is nou in 76 lande.

2 Maart 2020: Byna 90000 gevalle, meer as 3000 sterftes in 70 lande. Dit het sedert Vrydag, dus binne drie dae, na nóg 14 lande versprei. Van die nuwe lande is Portugal, Andorra, Skotland, Tseg Republiek, Armenië, die Dominikaanse Republiek, Ierland, Luxemburg, Katar, Ekwador, Mexiko, Monaco en Ysland.

Die beroemde Louvre-museum in Parys is vir ‘n tweede dag gesluit weens die personeel se vrese oor die coronavirus. Museums, toeristebestemmings en temaparke is nie ingesluit in die regering se verbod op groot byeenkomste wat Saterdag afgekondig is nie.

Twee dokters in Australië het die coronavirus opgedoen, wat die eerste gevalle is waar mense in die gemeenskap die siekte aan mekaar oordra.

Egipte en Nigerië het elk een bevestigde geval. Die adjunk-direkteur van die sentrum, Ahmed Ogwell, sê hulle werk nou saam met die owerhede in China om die verspreiding van die virus hok te slaan.

Net die lande in grys was op 2 Maart nog sonder COVID-19. Bron: https://www.bbc.com/news/world-51235105

28 Feb 2020: Die aantal gevalle staan op byna 84000, byna 3000 sterftes in 56 lande. Nuwe gevalle word die afgelope paar dae teen 4 – 6 nuwe lande per dag gediagnoseer.

In China is minstens 6 gesondheidspersoneellede dood en het 1716 COVID-19 opgedoen. (https://www.bbc.com/news/world-asia-china-51501005).

27 Feb 2020: Die WGO (Wêreldgesondheidsorganisasie) het intussen bevestig dat daar vir die eerste keer meer nuwe gevalle van die coronavirus in lande, buite China, aangemeld word, as in China self.

Gesondheidsowerhede in China sê sowat 14 persent van pasiënte wat herstel het van die nuwe coronavirus, COVID-19, en uit die hospitaal ontslaan is, het weer positief getoets vir die virus. Dieselfde verskynsel is in Japan aangemeld nadat ‘n vrou in haar veertigs vir die tweede keer positief getoets het nadat sy ontslaan is.

Die eerste minister van Japan, Shinzo Abe, het gevra dat alle skole vir ‘n maand gesluit word. Dit geld vanaf Maandag tot aan die einde van Maart. Waarnemers sê die tydelike sluiting van skole is ‘n aanduiding van hoe ernstig die Japannese owerhede die Corona-bedreiging beskou.

Saoedi-Arabië het die besoek van buitelandse pelgrims aan Mekka en Medina as ‘n voorsorgmaatreël teen die verspreiding van die COVID-19 virus opgeskort. Die Saoedi ministerie van buitelandse sake sê hy gaan ook tydelik toegang weier aan toeriste van lande waar die virus ‘n bedreiging is.

Nog sportgeleenthede word deur die verspreiding van die coronavirus geraak. Die Ierse rugbyunie het sy Sesnasie-wedstryd teen Italië op 7 Maart in Dublin uitgestel op aanbeveling van die land se gesondheidsowerhede. Die Italiaanse gholfspelers, Edoardo Molinari and Lorenzo Gagli, is intussen in kwarantyn in Muscat nadat hulle moes onttrek uit die Oman Ope wat vandag begin. Gagli het vandeesweek griepsimptome getoon, en is saam met Molinari wat sy kamermaat was, as ‘n voorsorgmaatreël afgesonder. Daar is nog geen formele planne om die Tokio Olimpiese Spele uit te stel nie, maar die Internasionale Olimpiese Komitee sê hy hou ontwikkelings fyn dop.

14 Feb 2020: Die groot sprong in die aantal gevalle tussen 11 en 12 Feb kan verklaar word deur die verandering in die WGO se definisie van aangemelde gevalle (https://www.worldometers.info/coronavirus/how-to-interpret-feb-12-case-surge/) wat beteken dat almal wat siek was en herstel het en die sterfgevalle, en ook word mense met enige simptome nou ook beskou word as COVID-19 gevalle, al het die virustoets nog nie bevestig dat die gevalle wel positief is nie. Dié syfer van onbevestigde gevalle is 13332.

13 Feb 2020: Die Coronavirus wat verantwoordelik is vir die huidige uitbreking, staan nou amptelik as COVID-19 bekend.

CO = Corona
VI = Virus
D= Disease
2019 = die jaar waarin die virus geïdentifiseer is.

12 Feb 2020: Japan het bevestig dat nog 39 mense aanboord van ‘n passasierskip in die hawe van Yokohama, suid van Tokio, positief getoets het vir die coronavirus. Die boot verteenwoordig die groot enkele uitbreking van die virus buite China, met ‘n totaal van 175 bevestigde gevalle. Die res van die Diamond Princess se sowat tweeduisend-600 passasiers en meer as duisend bemanning bly in kwarantyn.

11 Feb 2020: China het verskeie senior amptenare uit hul poste verwyder oor hul hantering van die uitbreking van die coronavirus. Die dodetal wat vanoggend aangekondig is, staan op 1016. Meer as 42-duisend gevalle is reeds in China bevestig, met nog 319 in verskeie ander lande.

10 Feb 2020: Die hoof van die Wêreldgesondheidsorganisasie, Tedros Ghebreyesus, het gewaarsku dat die verspreiding van die coronavirus buite China kan toeneem. Hy sê mense word siek wat nog nooit in China was nie.

Die aantal mense wat weens die Coronavirus dood is, het intussen met 97 gestyg. Dit is die grootste styging in een dag. Die totale aantal sterftes in China staan nou op 908, met meer as 40 000 mense wat siek is. Minstens 180 000 mense word gemonitor.

Lees ook:

Tydlyn van die verspreiding van die Corona uitbreking https://www.aljazeera.com/news/2020/01/timeline-china-coronavirus-spread-200126061554884.html

en

https://www.aljazeera.com/news/2020/02/cloneofcloneofcloneof200215224437270-20021623180-200218231013395.html

Statistieke oor die huidige uitbreking: https://www.worldometers.info/coronavirus/

Lees meer oor die Corona-virus uitbreking: https://www.webmd.com/lung/news/20200124/coronavirus-2020-outbreak-latest-updates

Nuusflitse

3 Feb 2020: Die hoof van die Wêreldgesondheidsorganisasie, Tedros Adhanom Ghebreyesus, het lande wat probeer om die verspreiding van die coronavirus hok te slaan, gevra om nie onnodig maatreëls in te stel wat kan inmeng met internasionale handel en mense wat reis nie. Hy sê sy versoek is waarskynlik te laat aangesien verskeie lande reeds vlugte na China gekanselleer het.

Die Chinese ambassadeur in Suid-Afrika, Lin Songtian, sê China is optimisties dat hy die verspreiding van die coronavirus na Afrikalande gaan bekamp. Die dodelike virus het reeds die lewens van meer as 360 mense geëis en sowat 17-duisend mense wêreldwyd is besmet. Daar is nog geen geval in Suid-Afrika aangemeld nie. Pandor sê die Suid-Afrikaanse regering verwelkom die skenking deur die privaatsektor.

Gesondheidspersoneel in Hong Kong het intussen met ‘n staking begin. Hulle eis dat die grens tussen Hongkong en die Chinese vasteland gesluit word om die verspreiding van die coronavirus te beperk. Die regering het so ver 10 van sy 13 grensposte gesluit. Gesondheidspersoneel sê die sluiting van die grens is die enigste manier om die gebied te beskerm. Die regering het tot dusver besoekers van die Chinese vasteland beperk, maar wil nie gehoor gee aan oproepe dat al die grensposte gesluit word nie.

29 Jan 2020: Die Duitse lugdiens, Lufthansa, het al sy eie vlugte en ook dié van Switserse en Oostenrykse lugdienste na en van China tot minstens 9 Februarie opgeskort weens kommer oor die coronavirus. Lufthansa sê vlugte na Hong Kong sal voortgesit word. Die amptelike dodetal in China staan op 132 en nuwe gevalle word dwarsoor die wêreld aangemeld.

Die eerste vliegtuig met buitelandse burgers wat uit die stad Wuhan in China ontruim is, het vroeër vandag in Tokio geland. Die 206 Japanese burgers het skanderings ondergaan voordat hulle toegelaat is om die vliegtuig te verlaat. Drie verdere gevalle van die coronavirus is in Duitsland bevestig en een in Japan. Die dodetal staan tans op 132.

Deur Marí Hudson