Groot vooruitgang in miëloom-behandeling


Groot vooruitgang is die afgelope dekade gemaak in die behandeling van miëloom, een van die drie hoofsoorte bloedkanker. Nuwe middels soos immunoterapie het reeds die oorlewingsyfer van miëloom van 2 jaar sowat 10 – 15 jaar gelede, verhoog tot 10+ jare vandag. In die toekoms kan dié syfer nog verder verbeter sodat miëloom wat vroeg opgespoor word, ‘n siekte kan word wat op die langtermyn bestuur moet word, het prof Vernon Louw, hoof van kliniese hematoloog by die Groote Schuur-Hospitaal en die Universiteit van Kaapstad, gesê.

Luister Woensdag om 11:30 na die gesprek met prof Louw oor miëloom.

Interessante feite


1. Miëloom kan beskryf word as kanker van bloedplasmaselle, en dié selle word in die beenmurg vervaardig. Die beenmurg (in groot skeletbene) is die fabriek waar alle bloedselle en dus ook foutiewe plasmaselle vervaardig word.
2. Miëloomselle is die abnormale selle wat vorm as B-limfosiete abnormale plasma-selle en dus ook abnormale teenliggame (immunoglobuliene) oftewel paraproteïene vervaardig.  Die vervaardiging en neerlegging van die abnormale para proteïene wat te groot is om deur die niere uitgeskei te word en kan die niere beskadig, en die bloed dikker kan maak, wat tot skade aan verskeie organe kan lei.
3. Omdat plasmaselle verantwoordelik is vir die vervaardiging van spesifieke teenliggame, word die pasiënt se immuunstelsel ook aangetas en kan hy/sy makliker infeksies kry.
4. Pasiënte met miëloom het ook bloedarmoede omdat die kankerselle die beenmurg oorneem en min plek laat om rooibloedselle te vervaardig.
5. Miëloom beïnvloed ook beenneerlegging omdat die kankerselle in die beenmurg die been self verplaas. Dit hol die bene uit, maak dit swakker, sodat dit makliker kan breek. Die effek op die bene lei tot pyn, en ook tot ‘n oormaat kalsium in die bloed, wat nadelige effekte op die liggaam het.
6. Dokters en pasiënte moet bedag wees op onverklaarbare laerrugpyn (gewoonlik die eerste plek waar die beenskade tot pyn lei), en daar moet ‘n bloedtoets gedoen word om die M-proteïen of ‘n ander proteïen, die beta-2-mikroglobulien, wat ook deur miëloomselle vervaardig word, se teenwoordigheid te bevestig om miëloom of vroeg te diagnoseer, of uit te skakel. In miëloom pasiënte het 70% hoë vlakke van IgG proteien, 20% het hoë vlakke van IgA en 5–10% het slegs ligte ketting immunoglobulien (Bence-Jones proteiene).
7. Vroeggediagnoseerde miëloom kan baie goed behandel word met stamselle van die pasiënt self, en geteikende immunoterapie (met of sonder chemoterapie) sodat die oorlewingsyfer binne een dekade van 2 jaar tot 10+ jare is.
8. Miëloom kom meer voor onder ouer mense, en kom nie in kinders voor nie.

Created for the National Cancer Institute, http://www.cancer.gov


Lees meer oor miëloom:

https://www.nhs.uk/conditions/multiple-myeloma/

https://www.mayoclinic.org/diseases-conditions/multiple-myeloma/symptoms-causes/syc-20353378

https://my.clevelandclinic.org/health/articles/6178-multiple-myeloma

https://www.cancer.org/cancer/multiple-myeloma/about/what-is-multiple-myeloma.html

https://www.cancercenter.com/cancer-types/multiple-myeloma

https://www.cdc.gov/cancer/myeloma/index.htm