In Suid-Afrika sterf vier vroue daagliks weens geweld deur ‘n lewensmaat. Dit is een vrou elke ses ure, en baie hoër as in ander lande wat met Suid-Afrika vergelyk kan word.

Geweldsterftes in Suid-Afrika is baie hoog en vergelykbaar met die sterftesyfers tydens oorloë. Die insidensie van interpersoonlike geweld as deel van dié syfer, is ook buitensporig hoog – 4 tot 10 keer hoër as in die meeste ander lande. Dit is die hoogste onder die bruin bevolking, en in sekere dele van die Kaapse Vlakte.

In Gesondheid op RSG gesels Marí Hudson met Prof Elmin Steyn, hoof van chirurgie van die Universiteit van Stellenbosch se Geneeskunde Fakulteit en die Tygerberg Hospitaal. As traumachirurg word sy en haar span té dikwels gekonfronteer met traumabeserings wat vroue opdoen weens interpersoonlike geweld.

Agtergrond-inligting oor Geweldsbeserings

Hier is enkele statistieke en syfers oor geweldsmisdade teen vroue met die vriendelike vergunning van Prof Elmin Steyn. Die inligting is bekom van onder meer mediese joernale, Stats SA, die boek Gang Town deur Don Pinnock, en ander betroubare bronne. Die kopiereg vir die visuele materiaal hieronder behoort nie aan RSG nie, en moet liefs nie gekopieer word nie.

• Die globale insidensie van femicide (female homicide) vir 2015 was 2,4 per 100 000 vroue. In Suid-Afrika was die insidensie in 2015 9,6 per 100 000 – dus 4x hoër as die globale gemiddeld – Africa Check.
• Elke ses uur word ‘n vrou in Suid-Afrika deur haar lewensmaat vermoor – MNR
• Die insidensie van interpersoonlike geweld teen bruin vroue is 18,3 per 100 000, dubbel die land se gemiddeld. Dit is dus 8x hoër onder bruin vroue en hul lewensmaats as die globale gemiddeld.
• 21 % van volwasse vroue in die land het reeds interpersoonlike geweld beleef – Stats SA
• Swart vroue in diep landelike gebiede, in lae-inkomste gesinne, is onderwerp aan die grootste risiko vir geweld deur hul lewensmaat – Stats SA
• Die hoë voorkoms van femicide en verkragting bly ‘n nasionale krisis – Stats SA
• Kaapstad is die moord-hoofstad van die land, en 15e op die wêreld-lys.
• Geweld teen vroue is baie nou verwant aan geweld in die gemeenskap

Elke bende op die Kaapse Vlakte het sy eie kultuur

Baie van die inligting is vervat in dié insiggewende boek deur Don Pinnock.