6-jarige se lewe word verander


Op Maandag 9 Mei 2022 het  die sesjarige Lydia Sinclair se lewe verander. Die Graad 1 leerder van Milnerton het ‘n hartprosedure ondergaan wat haar lewe gered het.

Luister om 11:30 na Gesondheid op RSG. Mari Hudson gesels met die dokter en hy vertel hoe die prosedure om haar vinnige hartklop te herstel, gedoen is.

Agtergrond

Minute voordat Lydia in die teater ingestoot is.

Lydia het vandat sy drie jaar oud is, skielik naar geword en flou geword. Toe haar ouers, Janelle en Ian Sinclair, haar na hul huisdokter neem, het hy dit afgemaak, maar die floutes het al gereelder voorgekom. Toe is sy na die Rooi Kruis Kinderhospitaal verwys, maar na ‘n EKG het die dokters haar op medikasie geplaas en huis toe gestuur. Steeds het sy al hoe meer kere flou geword. Haar ouers het nie ‘n mediese fonds nie, en hulle kan nie private sorg vir hul kind bekostig nie.

‘n Lidmaad van hul kerk het gehoor van Dr Gopal en toe gereël dat Lydia hom gaan sien. Hy was doodseker dat Lydia ‘n hartritme-defek het wat in haar boonste hartkamers ontstaan, en dat hy dit kan herstel.

Toe hy hoor dat hul kerk besig is om geld in te samel vir die prosedure, het hy sy diente gratis aangebied en met elke rolspeler – van die narkotiseur, tot die teaterpersoneel, hart-tegnici, die toerusting-verskaffers en die hospitaal gereël dat alles pro deo gedoen sal word.

Stap 1. Maandagoggend is Lydia die teater ingestoot. Sy het ‘n ligte narkose gekry.

Stap 2. Drie gidsdrade is via die femorale are in haar regter- en linkerlies tot in haar hart gestoot tot op baie presiese plekke.

Stap 3. Toe het die dokter deur klein elektriese prikkels die vinnige hartritme probeer opwek. Dit het nie gewerk nie. Toe spuit hulle haar ‘n klein dosis isoprenalien, wat byna soos adrenalien werk, en toe gaan haar hartjie woes aan die klop.

Stap 4. Terwyl dit teen 300 slae per minuut klop, kon mens ook sien hoe haar bloeddruk dramaties val. Dit was in hierdie kort tydjie dat dr. Gopal die EKG kon vertolk en bereken dat die ekstra stimuli om die hartspoed so op te jaag, van ‘n tweede natuurlike baan in die regter-ontvangkamer kom. In daardie oomblikke kon hy die presiese diagnose maak en het hy geweet hoe om die probleem op te los.

Sommige mense word gebore met ‘n tweede geleidingsbaan in die regter-atrium.

Normaalweg het mense net een baan van die SA node in die regter-atrium tot by die AV node wat in die septum tussen die onderpunte van die twee ontvangkamers sit. Dan stuur die boonste SA node seine vir die AV node om te sê hoe vinnig die AV node weer seine via die His bondel verder in die septum afstuur wat selfs om die ventrikels gaan en dié seine stimuleer dan sametrekking van die atria en die ventrikels.

Maar met die bykomende natuurlike stoombaan kom daar ook onder sekere omstandighede bykomende seine vanaf die tweede stroombaan wat dan chaos veroorsaak. Die seine kom saam met die normale seine, lei tot oormatige prikkeling van die AV node, en maak boon-op dat die seine nou net van bo na onder in die AV node beweeg nie, maar sommer van onder na bo ook.

 

Stap 5. Die tweede natuurlike geleidingsbaan loop van die klep tussen die regterkamers na die openingkie waar die koronere vat in die regter atrium inkom. Dis ‘n piepklein are van 5mm wat naby aan die AV node geleë is. Indien die dokter nie uiters versigtig werk nie, kan hy die AV node beskadig en dan moet die pasiënt ‘n pasaangeër kry, wat mens beslis nie vir ‘n kind wil hê nie.

‘n Driedimensionele beeld van Lydia se hart wat deur die rekenaar opgebou is.

Stap 6. Alles het uiters goed afgeloop. Nadat die tweede geleidingsbaan met hitte-ablasie geneutraliseer is, kon die span nie weer die vinnige hartklop opwek nie, en het hulle vir seker geweet Lydia is genees.

Indien Lydia nie behandel is nie, sou die hartritme-defek haar hart beskadig het, en kon sy skielik gesterf het, of anders sou haar hart vergroot het en sou sy gesterf het.

 

Die vinnige hartklop kan op drie van die skerms gesien word en die gidsdrade se posisie op die ander twee. Met die vertolking van dié EKG golwe, het Dr Gopal die diagnose gemaak wat toe gelei het tot die korrekte behandeling.