Masels is nie kinderspeletjies nie


Hoekom is masels gevaarlik?

Dit is hoogs aansteeklik en kan tot breinontsteking en gevolglike permanente breinskade lei asook ernstige longontsteking en diarree en kan ook tot die dood lei.

Oningeënte kinders kan ander kinders en grootmense aansteek en tot hul dood lei.

Masels is in die kollig omdat uitbrekings van dié kindersiekte in verskeie noordelike en noordoostelike provinsies in ons land aangemeld is.

Dr Thandi Wessels, pediater verbonde aan die Tygerberg Hospitaal vertel meer oor masels, en ook bietjie oor kinkhoes, wat ook aan die toeneem is, en cholera.

Meer inligting oor Masels

‘n Voorstelling van die maselsvirus.

  • Masels word deur die maselsvirus veroorsaak. Dit is ‘n morbilli-virus en bestaan uit RNA, en nie DNA soos by die mens nie.
  • Masels word ook rubeola genoem.
  • Die eerste 10 tot 14 dae nadat die pasiënt in kontak was met iemand met masels, versprei die virus in die liggaam, maar die pasiënt is nog nie siek nie. Dit is die inkubasietyd van kontak tot simptome.
  • Dan begin die eerste simptome, wat matig en baie algemeen kan wees. ‘n Droë hoes, seer keel, loopneus, konjuktivitis (pienk oë) kan 2 tot 3 dae duur.
  • Koplik vlekkies in die mond lyk soos soutkorreltjies op die rooi slymvliese.

    Een van die eerste tekens wat dikwels vroeg sigbaar is – nog voordat die uitslag verskyn – en tipies is van masels, is die Koplik vlekkies in die mond en verhemelte. Dit lyk soos soutkorreltjies teen die rooierige slymvlies.

  • Na die eerste 2 tot 3 dae word die siekte en simptome akuut: Die koors kan baie hoog word (tot 41 C, wat gevaarlik hoog is) en die uitslag verskyn agter die ore, in die nek op die gesig begin en dan oor die hele liggaam versprei.
  • Stridor – die flluiterige, ‘wheezing’ geluid wat dui dat die pasiënt moeilik asemhaal omdat die lugweë geswel en dus vernou is – is ook gereeld aanwesig.
  • Die uitslag van masels begin agter die ore, die nek en die gesig en versprei dan vinnig na die res van die lyf.

    Die uitslag is groterige plat rooi vlekke wat later bulterig word. Dit begin agter die ore, in die nek en gesig en versprei dan na die bors, romp, arms en bene.

  • Die uitslag is sowat 7 dae lank sigbaar en klaar algaande op. Die simptome klaar algaande op, maar die gehoes en tekens van die veluitslag kan vir 10 dae duur.
  • Die veluitslag is groterige rooierige vlekke wat later opgehewe word. Dit jeuk.

    Die pasiënt kan ander mense aansteek vanaf 4 dae voordat die uitslag verskyn tot op dag 4 van die uitslag.

  • Besoek jou naaste kliniek of dokter sodra die eerste simptome verskyn nadat jy of jou kind in aanraking was met iemand wat masels onder lede het. Die meeste kinders herstel goed na masels, maar omdat die komplikasies so ernstig is, moet ‘n mens bedag wees daarop en vinnig optree as nodig.
  • Masels kan voorkom word deur die maselvaksien.
  • Meer as 90% van kinders in ‘n gebied moet ingeënt wees om ‘n masel-uitbreking te voorkom. Die lae inentingskoers in Limpopo en Mpumalanga, en selfs in ander provinsies, is die hoofrede vir die uitbrekings van masels in die noorde en ooste van die land. Selfs in Wes-Kaap is nie 90% van alle kinders ingeënt nie.
  • ‘n Landwye masels-inentingsveldtog is aangekondig weens die uitbrekings.
  • Die Duitse masels veluitslag lyk baie soos die masels-uitslag. Maak nie saak of jou kind masels of Duitse masels het nie, besoek jou kliniek of dokter as jy of jou kind griepagtige simptome het en ‘n veluitslag.