Regstreekse konsert die hoogtepunt van verjaardagvieringe


RSG vier 85 Jaar van Afrikaanse Radio met ‘n hoogtepunt – ‘n regstreekse konsert van U Eie Keuse vanuit die SABC se M1-Ouditorium in Auckland Park.

Hierdie luisterryke en bykans twee uur lange konsert word moontlik gemaak deur die Rupert-Musiekstigting en vind op Saterdag 29 Oktober plaas.

Die konsert, wat om 20:00 sal begin, word aangebied deur Willem Pelser en sal bestaan uit die gewildste versoeke van RSG se luisteraars.

Eddie Clayton

Die Naledi-bekroonde dirigent Eddie Clayton sal op die podium wees en is ook verantwoordelik vir die musiekverwerkings.

Hoewel die program asook die soliste (sangers en instrumentaliste) eers later bekend gemaak kan word, sal luisteraars hul kan verkneuter in die tydlose deuntjies wat oor die dekades heen in hierdie program – die oudste op Afrikaanse radio – versoek is. Die geskiedkundige en majestueuse orrel in die M1-ouditorium gaan ook tydens die konsert gehoor word.

Naas die eregaste sal van RSG se luisteraars ook die konsert kan bywoon. Bly dus ingeskakel om te hoor hoe jy die konsert gratis kan bywoon.

Die konsert sal regstreeks vanaf 20:00 tot 22:00 uitgesaai word en sal ook deur bekende en gewilde omroepers bygewoon word.